Апроект “Асаркьал”

Апроект “Асаркьал”

Абар уажәшьҭа 7 шықәса ҵуеит АҞӘАФОН аус ацнауеижьҭеи Аҧсны иакзаҵәыку апрофессионалтә абжьы анҵаратә студиа «АМА RECORDS». Уаҟа аус руеит абаҩхатәра злоу амузыкарҳәаҩцәа ҿарацәа Анри Гәымба,  Алхаси Алмасхани Марколиаа, Ҭемыр Нарманиа.

Ари аамҭа иалгаӡаны,  амузыкарҳәаҩцәа рырҿиара иабзоураны имҩаҧгоуп акрызҵазкуа АҞӘАФОН апроектқәа: ателехәаҧшратә проект “Раида”, амузыкатә проект “Аҧсны Star”, ҩ-хәҭакны иҟоу амузыкатә фильм “Ҳара ҳаруаа реиҳабы”, афильм “Акәымжәыуаа”, апроект “Ҳара ҳаруаа реиҳабы” аҟнытә ашәақәа рыманы амузыкантцәа ргастрольтә тур амҩаҧгара, иара убас  апроект “Аҧсны ашьхара” азы иаҧҵаз автортә музыка аҧҵара.

 2016 шықәсазы абжьҭаҩратә студиа «АМА RECORDS» ихацнаркит апроект ҿыц “Асаркьал” анагӡара. Уи апроект спонсорс иқәгылеит АҞӘАФОН.  Апроект идеиа хадас иамоуп аҧсуа жәлар рмузыка ҳаамҭазтәи аус адуларала ацәыргара.  “Асаркьал” - зымҽхак ҭбаау проектуп. Уи аҳәаақәа ирҭагӡаны иазҧхьагәаҭоуп жәлар рашәатә композициақәа еиуеиҧшым ҳаамҭазтәи ажанрқәа ирылаӡҩаны амузыкатә диск ашҟа аиагара.

Аҧсуа жәлар рмузыка аҭоурых даара ибеиоуп. Уи иамоуп иҷыдоу абжьы, агармониа, еиуеиҧшым, абжьы рацәа змоу аинструментқәа. Убри иабзоураны, ари апроект хықәкыс иамоуп жәлар рмузыка аларҵәара.

 Амузыкатә композициақәа раҧҵара апроцесс иалагӡаны, апроект иадыҧхьалан еиуеиҧшым абиҧарақәа иреиуоу жәлар рашәақәа  рынагӡаҩцәа - ашәаҳәаҩцәеи амузыкарҳәаҩцәеи.  Аранжировкақәа ранҵара азҧхьагәаҭоуп еиуеиҧшым аҧсуа жәлар ринструментқәеи ахортә шәаҳәареи рхархәарала, ҳаамҭазтәи аинструментқәа рыцҵаны.

  Арҿиаратә студиа «AMA RECORDS» -  иахьазы  аҧсуа музыкатә культураҿы акрызҵазкуа хәҭакуп.  АҞӘАФОН  азы ас еиҧш иҟоу абаҩхатәра злоу ауаа рывагылара, урҭ рырҿиара аизырҳараҿы ацхыраара рыҭара иаанаго, ҳаамҭазтәи амилаҭҭә культура аизҳара аус аҿы ахатәы лагала аҟаҵароуп! Арҿиаратә гәыҧ ари  апроект  ахыркәшара азҧхьагәаҭаны ирымоуп 2018 шықәса, лаҵарамза азыҳәан.

«АҞӘАФОН-GSM» адәныҟатәи аимадарақәа рыҟәша