Апрофессионалтә боқс “Ачемпионцәа рира” ахәылҧаз.

Апрофессионалтә боқс “Ачемпионцәа рира” ахәылҧаз. 

Нанҳәа 19, 2017 шықәсазы Аҟәа, азал “Абырлаш” аҿы АҞӘАФОН Ахадаратә спонсорра ала имҩаҧысит Апрофессионалтә боқс “Ачемпионцәа рира” ахәылҧаз. Уи рҽаладырхәит Аҧсни, Урыстәылеи, СНГ аҳәынҭқаррақәеи, Европеи рҟынтәи апрофессионалтә боқсиорцәа. Ахәылҧаз аҿы хҭыс хаданы иҟалеит  Аҧснытәи абоқсиор Баҭал Ҷежьиеи Узбекисҭантәи абоқсиор Иззаҭ Ибрагимови ажурнал “Про Бокс” аверсиа ала  СНГ-и Славиантәи атәылақәеи рчемпионра атитул азы реицлабра.  Аицлабра шьақәгылан араундқәа 8 рыла, аха ахҧатәи араунд аҿы Баҭал Ҷежьиа иацлабуаз абоқсиор анокаут днаишьҭит, уаҳагьы уи аицлабра изацымҵаӡеит.

 Баҭал Ҷежьиа уи ититултә еидыслара инаҷыдангьы, иҟан аҩбатәи атитултә еицлабра, ажурнал “Про Бокс” аверсиа ала  СНГ-и Славиантәи атәылақәеи рчемпионра амаҟа аиуразы. Уи  иазықәҧон аҳәса рхаҭарнакцәа – Урыстәылантәи Марина Поповеи Сербиантәи  Ксениа Медичи.  Ари аицлабраҿы аӡбаҩцәа ишышьақәдырҕәҕәаз ала, аиааира лгеит Урыстәылатәи аспортсменка Марина Попова.

Ахәылҧаз аҿы ихадаз ахҭысқәа иреиуаны имҩаҧысит аҧсуа боқсиор Игор Адлеибеи Урыстәылатәи аспортсмен Ваге Киракосиани рдебиуттә еицлабра. Игор раҧхьатәи асекундқәа инадыркны дзацлабуаз иаасҭа иласреи иқшашьеи рыла аҧыжәара игеит. Аҧшьбатәи, аҵыхәтәантәи араунд аҿы аҧсуа спортсмен иацлабуаз  нокаут днаишьҭит, уи алагьы аицлабра аанкылан. 

 Уи инаҷыдангьы, ари аусмҩаҧгатәы аҳәаақәа инарыҵакны,  нанҳәа 18 рзы Амҳаџьырқәа Рыгаҿа аҟны имҩаҧысит аспортсменцәа рыкапанра иазкыз ацеремониа. Ас еиҧш иҟоу аусмҩаҧгатәы Аҧсны раҧхьаӡа акәны имҩаҧган Аҧснытәи Апрофессионалтә Боқс Афедерациеи  Промоутертәи Ахеидкыла   SKV-BOXING  русеицурала.

Атурнир аҿы имҩаҧысит иланарҧшыроу апрофессионалцәа реидысларақәа 9, урҭ рыҩныҵҟа иҟан ҩ-титултә еидысларақәак. Раҧхьатәи аминуҭқәа инадыркны аҵыхәтәанынӡа атурнир ауаҩы илаҧш аргәырҕьаратә имҩаҧысит, уи аиҿкаара аганахьала еиҧш, ауаа рацәа  рыларҵәара аетап аҿгьы.

Раҧхьаӡа инаргыланы, игәаумҭар залшомызт атурнир иаҭааз ауаа рхыҧхьаӡара. Еиҳаракгьы уаҩ деигәырҕьартә иҟан хықәкыла еизаз аудиториа рыхдырра аҳаракыра. Уаҩы имбар залшомызт, ахәаҧшцәа имҩашьо хымҧада ишеилыркаауаз иахьаази иззаази, азал зегьы аҿы рҽеиҩшаны итәан агәыҧқәа, емоциа ҳаракыла абоқсиорцәа ргәы зырҕәҕәоз, ирыдгылоз, уи, ҳәарада, атурнир аланарҧшыра иацнаҵон.

Аспорт аганахьала уахәаҧшуазар, ахәаҧшцәа ирыман алшара, капанрыла еиуеиҧшым акатегориақәа рхаҭарнакцәа злахәыз хыҧхьаӡара рацәала аидысларақәа рылахәхара. Урҭ ахәаҧшцәа ирырҭеит агәаҳәара ду,  абоқсиортә емоциақәа рацәаны.

 «АҞӘАФОН-GSM» адәныҟатәи аимадарақәа рыҟәша.