АҞӘАФОН: 2014 шықәсазтәи аихьӡарақәа

АҞӘАФОН: 2014 шықәсазтәи аихьӡарақәа

«Аимадара умырӡын!» – абри ажәеицааира девизс иҟаҵаны 2003 шықәсазы аусура иалагеит Аҧсны Аҳәынҭқарра  раҧхьаӡатәи амобилтә оператор. Абар уажәшьҭа 11 шықәса ҵуеит АҞӘАФОН  есышықәса атехникатә лшарақәеи, амчқәеи, аусзуҩцәа рпрофессионалреи азыркуеижьҭеи еснагь, ианакәзаалакгьы, иахьакәзаалакгьы, аҭагылазаашьа зеиҧшразаалакгьы ҳабонентцәа ргәакьацәеи  дареи еимадазарц азы.

Ахәхшәааратә планқәеи, Аинтернет-маҵзурақәеи,  ихарҭәаау асервисқәеи аопциақәеи – АҞӘАФОН аҟнытә арҭ  аалыҵқәа  зегьы хықәкыс ирымоу дарбан абонентзаалак  изы амобилтә еимадара ахархәара иахьынӡалшо иманшәалазарц ауп.

Сынтәа АҞӘАФОНи уи ахархәаҩцәеи даҽа шьаҿакгьы ҟарҵеит ҳаамҭазтәи Аинтернет-технологиақәа рышҟа! Нанҳәа 6 рзы АҞӘАФОН Аҧсны ақалақьқәа зегьы рҿы аусура иаланаргеит абиҧара ҿыц иатәу аҳа 4G (LTE).

Аҳа 4G (LTE)  аушьҭра аҳәаақәа ирҭагӡаны ҳаҳҭны қалақь агаҿаҟны мҽхакы ҭбаала имҩаҧган  АҞӘАФОН 4G  аӡыргара иазкыз аусмҩаҧгатәқәа.  Аҧсуа ҳәынҭқарратә телеканал аҿы ишиашоу ицоу аефир ала символтә ҳасабла идырбан  ари аҳа  аушьҭра. Иара убас амодемқәа  4G рхархәарала иҿыцу абиҧара иатәу атехнологиа алшарақәа лабҿаба дырбаразы АҞӘАФОН еиҿнакааит ателецҳақәа ҩба: Аҟәа-Ҧсоу; Аҟәа-Тҟәарчал.  Ари ахҭыс зеиҧшыҟам ала иаанарҧшит аиндаҭлараҿы  АҞӘАФОН иамоу аҧыжәара хада –  аҳа 4G (LTE) ала Аҧсны ақалақьқәа зегьы хаҭабзиарала рыхҩара. 

АҞӘАФОН атехникатә ҟәша аспециалистцәа аусура иаҿуп 4G абазатә станциақәа реизырҳаразы, Аҧсны анхарҭатә ҭыҧқәа зегьы рҿгьы иҿыцу атехнологиақәа аус рдыруразы. Уи АҞӘАФОН абонентцәа ирынаҭоит алшара 4G (LTE) аҳаҿы 100 Мбит/сек аҟынӡа арласра хагаланы амаҵзура “Амобилтә интернет” ахархәаразы.

               

Амаркетингтә политика

4G аҳа аус арура иабзоураны Аинтернет-хархәаҩцәа раудиториа хықәкыс измаз ахәхшәааратә планқәа рырҿыцра алыршахеит. 2014 шықәса инаркны еиҳа азҿлымҳара змаз ахәхшәааратә планқәа рҿы абонент хәыҧса иалоу, здыррақәа рышьҭра  4G  астандарт аҿгьы иалшо Аинтернет-пакетқәа рышәагаа иацҵан.

 Хаҭабзиарала   иҧсаххеит злимит ҧкым Аинтернет-хәыхшәааратә планқәа рцәаҳәагьы. Аопциа “Арласга” иабзоураны ахәхшәааратә планқәа “Алимитдатә Интернет 1250”-и “Алимитдатә Интернет 1250”-и  рхархәаҩцәа ироуит алшара, уахыки-ҽнаки рыхәхшәааратә план иазыҧҵәо аквота анынҵәалакгьы, адыррақәа рышьҭраан иахьынӡалшо арласра аиқәырхара. АҞӘАФОН абонентцәа рзы иалыршоуп 250 МБ, 500 МБ, иара убас  1000 МБ ашәагаа змоу  “Арласгақәа”.

Акырӡа ирманшәалоуп амаҵзура “Агәрагара ахәхшәаара-VIP” рыдгалараҿы аҧҟарақәа – аус аларгаразы амаҵзура акомиссиа ахәҧса 2,5 рҟынӡа иларҟәуп.

2013 шықәсазы iOS-и Android-и рышьаҭала аиҿартәырақәа рзы  АҞӘАФОН иҭнажьит амобилтә ҧшьы  «AQUAFON амаҵзура». Иманшәаланы  аус зуа уи аҧшьы иабзоураны абонентцәа рхала ирылшоит Ахеидкыла амаҵзурақәа анапхгара рыҭара. Уи смартфон ахархәаҩцәа рзы зеиҧшыҟам цхыраагӡаны иҟалеит. Сынтәа аԥшьы «AQUAFON амаҵзура» алыршахеит AppStore-и  iPad-и рҿы.

Аҧсны абанки ателекоммуникациеи рсферақәа рхеибарҭәааразы иҿырҧшы бзианы иҟалеит Аҧсны Амилаҭтә банки АҞӘАФОН-и  русзуҩцәа русеицура иалҵшәаны иаҧҵахаз амаҵзура  «SMS-сервис».  Амаҵзура  «SMS-сервис»  иабзоураны Аҧсны раҧхьаӡа акәны ахархәаҩ ихаҿытә ҧхьаӡараҿы иҭоу активқәа  дистанциала напхгара рзиуртә еиҧш алшара ҟалеит. Иара убас уи иалнаршоит акарта АПРА зку ахархәаҩ ибанктә хыҧхьаӡара иҭоу аҧарақәа ахьцо оперативла ахылаҧшра аҭара. Ари амаҵзура  аусура аларгара алшоит АПРА ахәшәаратә система ахьыҟоу атерминал аҟнытә.

АҞӘАФОН аҟнытә ашықәс ҿыц аламҭалазтәи  ҿыцраны иҟалеит ахәхшәааратә  план “Афырҭын”. “Афырҭын” – еиҳаны аицәажәара, еиҳаны Аинтернет -  ирацәаны ацәажәара бзиа избо, иара убасгьы Аинтернет-қәыҧшылара зхы иазырхәо рзы. Ари ахәхшәааратә аҿы ахархәаҩцәа ирыдгалоуп АҞӘАФОН аномерқәа рышҟа ҳәаа змам хыҧхьаӡарала аҭел асра, 4000 МБ Аинтернет-трафик, 200 минуҭ аҭел асра даҽа операторк иномерқәа рышҟа, 50 минуҭ иалҵуа жәларбжьаратәи аҭел асрақәа рзы,  убасгьы  50 SMS. Абоненттә хәыхшәаара  – мызкы  1299 мааҭ ыҟоуп.

Ахархәаҩ имаҵура аиҕьтәра иадҳәалоу апрограмма аҳәаақәа ирҭагӡаны АҞӘАФОН есышықәса иацнаҵоит ахатәы маҵзуратә Ҭыԥқәа рхыҧхьаӡара. 2014 шықәсазы АҞӘАФОН иамоу ахархәаҩцәеи наҟ-наҟ иззыҧшу абонентцәеи рзы рышәқәа ҟьаҟьаӡа иаадыртит Амаҵзуратә Ҭыԥ ҿыцқәа ҧшьба: ақалақьқәа Тҟәарчали, Очамчыреи, Афон Ҿыци, иара убас Ҧсоу аҳәааҿи.  2014 шықәса абҵара 13 инаркны АҞӘАФОН Амаҵзуратә Ҭыԥқәа зегьы рҿы ҳара ҳабонентцәа ироуа, аквалификациа ҳаракы змоу абжьагарақәа рнаҩсгьы, илаҟәу хәыҧсала ирылшоит иаархәарц ҳаамҭа иашьашәалоу, истильтәу, зымҽхак ҕәҕәоу адеваисқәа - 4G  аҿы аус зуа HUAWEI апланшетқәа.

 

Асоциалтә политика

АҞӘАФОН аусура амҽхак убас иҭбаауп, уи иаҵанакуа, зинтересқәа ирхьысуа ауаа рхыҧхьаӡарагьы акырӡа ирацәахартә еиҧш. Убри иахылҿиаауеит АҞӘАФОН аусураҿы изықәнықәо акрызҵазкуа апринципқәа: ауаажәлар ринтересқәа рызҿлымҳара, иааизакны ареспублика асоциал-економикатә ҿиара ацхраара, ауаа рсоциалтәи рдоуҳатәи ҭышәынтәалара азықәҧара.

Ахеидкыла иалшоит ахатәы бизнес иҭышәынтәаланы еизҳауа, иара убри аамҭазгьы асоциалтә ҭакҧхықәра азҿлымҳара ҷыда аҭо аҟаҵара. Ауаажәларратә хырхарҭа змоу АҞӘАФОН апроектқәа рыхьӡынҵаҿы иҟоуп еиҧҟьарак ҟамҵакәа имҩаҧысуагьы. Урҭ иреиуоуп хәажәкыра 8-еи, рашәара 1-и, цәыббра 30-еи ирықәыршәаны имҩаҧырго акциақәа.

Сынтәа Жәларбжьаратәи аҳәса рымшныҳәазы АҞӘАФОН агәцаракра рзыруит  быжьҩыки уи инеиҳани  зықәра намӡац ахшара зааӡо анацәа-фырҧҳәызбацәа. Аныҳәамш азы 20-ҩык аҳәса ирыҭан ашәҭ шьыҵәрақәеи 14 000 мааҭ инаӡо асертификати -  абзазаратә техника иеиуоу комплектк дасу излаалхәаша аҧара.

Ҳреспублика иқәынхо аҳәса зегьы рзы ҳамҭаны иҟалеит Р.Џь.Гәымба ихьӡ зху Аҧснытәи Аҳәынҭқарратә  филармониаҿы АҞӘАФОН афинанстә цхыраара иабзоураны хәажәкыра 6 рзы имҩаҧгаз аконцерт ”Сгәацаҧха, сыхаара”.

Аџьынџьтәылатә еибашьра Дуӡӡа 69 шықәса ахыҵра иадҳәаланы АҞӘАФОН инанагӡеит иаразнакала асоциалтә акциақәа хҧа. Есышықәсатәи акциа аҳәаақәа ирҭагӡаны иахьанӡа зыҧсы ҭаны иаанхаз (Аҧсны иҟоуп 75-ҩык) Аџьынџьтәылатә еибашьра Дуӡӡа аветеранцәа доусы рпенсиа 2500 мааҭ ацҵан. Аҩбатәи акцианы иҟан АҞӘАФОН амаҵ азызуа рхаҭарнакцәа 4-ҩык ҳџьынџьуаа аҳәсақәа Ленинградтәи аблокада зхызгаз сасра иахьырҭааз. Урҭ ашәҭ шьыҵәрақәа рыдагьы аматериалтә цхыраара рзыҟаҵан. Ахҧатәи акцианы иҟалеит АҞӘАФОН аҟнытә амузыкатә дныҳәалара – Аҟәа Амҳаџьыраа рыгаҿа аҟны имҩаҧган Михаил Алхазов напхгара ззиуа аинструменталтә ансамбль ақәгылара.

Рашәара 1, Ахәыҷқәа рыхьчара Жәларбжьаратәи амш азы АҞӘАФОН есышықәса еиҧш сынтәагьы Аҧсны ахәыҷқәа агәырҕьаратә ныҳәа рзеиҿнакааит. Афон Ҿыц ақалақьтә стадион аҿы имҩаҧысит зымҽхак ҭбааз ахәыҷтәы ныҳәа. Ари алакәтә қәгылара сасцәаны иаҭааит Афон Ҿыци, Аҟәеи, Гәдоуҭеи ақалақьқәа рҟынтә ахәыҷқәа. Амшын еиҧш ихыш-хыҵәо агәырҕьара рызнарҵысит ҳреспублика ахәыҷқәа бзиа еицырбо амультфильмқәа рҟынтәи аперсонажцәа алархәны дара рзы еиҿкааз аицлабрақәа, аестафетақәа, акьанџьақәа ршоу, ашәаҩақәа ирықәгыланы аицлабрақәа, ажонглиорцәа рықәгылара, асапын шәах ашоу. Уи аҽны ахәыҷқәа ирыҭан ирацәаны аҧхьахәқәа, аҳамҭақәа.

Абар шьҭа 21 шықәса ҵуеит цәыббра 30 рзы ҳреспубликаҿы инарҭбааны иазгәарҭоижьҭеи Аҧсны Аԥсуа жәлар рџьынџьтәылатә еибашьра Аиааира амш.

Аиааира 21 шықәса азгәаҭараан, асоциалтә акциақәа рҳәаа инҭагӡаны АҞӘАФОН Гагратәи Ареспубликатә  Реабилитациатә Центр иазоунашьҭит 100 нызықь мааҭ аҧара, иара убас убриаҟара рырҭеит ауаажәларратә еиҿкаара “1992-1993 шықәсқәа рзы аибашьра иалахәыз аҳәса-хымхәацәа Рассоциациа” алахәцәа аныҳәатә усмҩаҧгатәқәа реиҿкааразы.

АҞӘАФОН аспонсорра иабзоураны иалыршахеит аибашьра иазку ажәабжьқәа реизга “Уи, зҩызцәа зыхьчоз” 3000 екземплиар аҭыжьра. Апроект автор Рисмаг Аџьынџьал илшеит Аҧсны Аџьыньтәылатә еибашьра иалахәыз ауаа хаҭала излахәыз, ма шаҳаҭцәас измаз ахҭысқәа ртәы еиҭазҳәо, еиуеиҧшым аамҭақәа рзы урҭ иркьыҧхьхьаз, ма асоциалтә ҳаҿы ианырҵахьаз 22  ҭоурых реизгара.

Аиааирамш азы рныҳәаҧхьыӡ ҩнаҭацыҧхьаӡа ирызнаргарц азы АҞӘАФОН аусзуҩцәа иаздырхиеит Аиааира 21 шықәсхыҵра иазкыз авидеоролик. Уи аныҳәамш азы ателехәаҧшратә каналқәа аҩбагьы рыла идырбан. Ателевизор аекранқәа рҟынтә аибашьратә хроника акадрқәа рфон аҿы игоит Аҧсны Аҳәынҭқарра Раҧхьатәи Ахада В.Г.Арӡынба ибжьы ҿаца - ирыдиныҳәалоит аҧсуа жәлар акыраамҭа иззыҧшыз ахақәиҭреи аиааиреи!

Аҧсны аџьынџьтәылатә еибашьра ҳажәлар рзы ихақәиҭратә еибашьраны, Аҧсны ахьыҧшымразы, ҳхатәы бызшәа аиқәырхареи, уи ахы иақәиҭны ахархәара азин амазаареи рзы  ақәҧара иасимволны иҟалеит. Хыла  убри азыҵәҟьа цәыббра 30 инақәыршәаны АҞӘАФОН иазнархиеит даҽа роликкгьы – уи аҿар рабиҧара  аанаҧхьоит  рхатәы бызшәа аҵарахьы, уи ала ацәажәарахь, аиқәырхарахь.

Аҧсуа бызшәа аҿиара ахырхарҭала АҞӘАФОН иааннакыло активлатәи апозициа дырҩегьых иаанарҧшит сынтәа ихацнаркыз апроект ҿыц ала. Ашықәс зегьы еиҧҟьарак ҟамҵакәа аусура мҩаҧысуан АҞӘАФОН аофициалтә саит www.aquafon.com  Аҧсуа версиа аҧҵаразы. Абасала, 2015 шықәсазы АҞӘАФОН Аҧсны раҧхьатәи коммерциатә еиҿкаарахоит, заофициалтә саит Аҧсны аҳәынҭқарратә бызшәала ахархәаразы алшара ҟазҵо.

Апатриоттә хырхарҭа змоу апроектқәа рынагӡара иацҵо, АҞӘАФОН аҿари аспорти русқәа Ареспубликатә комитети Аҧсны Аҿартә еиҿкаарақәа Рассоциациеи алархәны 2009 шықәса раахыс “Аҧсны ақалақьқәа рҿы зымҽхак ҭбаау абираҟқәа” зыхьӡу апроект иаҿуп. Хәышықәса рыҩныҵҟала Аиааиреи Ахьыҧшымреи рсимвол шьақәыргылан Аҧсны ақалақьқәа зегьы рҿы, Гәылрыҧшь аҳаблаҿы, Аҧсны аҳәынҭқарра абираҟи агерби равтор Валери Гамгиа дахьжу иқыҭа гәакьа Кәтол, иара убас ақыҭа Аҽгәара -  аибашьратә гәыҧ “Дед” ахьҭахаз аҭыҧ аҿы.

2014 шықәса, ҧхынҷкәын мзазы Аҧсны аҳәынҭқарратә бираҟқәа ҩба шьҭыхын Аџьынџьтәылатә еибашьраан афронт ацәаҳәа ахьыҟаз Ҵаҟатәи Ешыреи аидыслара ҕәҕәақәа зныкымкәа иахьымҩаҧысуаз аҳаракыра Аныуаа рхәаҿи.

2012 шықәса алагамҭазы  АҞӘАФОН-и уи абонентцәеи рҽаладырхәит афонд “Ашана” имҩаҧнаго агәыҳалалратә акциа. Уи аамҭа аҩныҵҟала жәанызықьҩыла АҞӘАФОН абонентцәа рҽаладырхәит ачымазцәа гәаҟқәа рыхәшәтәразы аҧара аизгараҿы. Сынтәа афонд “Ашана” аихшьаалатә еизараҿы Аҧсны раҧхьатәи амобилтә еимадара уажәшьҭа ҩынтәны иалнакааит  акциа “Аҧсҭазаара еицеиқәҳархап” зегь реиҳа активла зҽалазырхәыз абонентцәа. Хәҩык АҞӘАФОН ахархәаҩцәа, 2014 шықәсазтәи агәыҳалалра акциа амҩаҧгараан   зегь реиҳа зхы активла иаазырҧшыз Ахеидкыла аҟынтәи иранашьан агәалашәаратә стелақәеи, акорпоративтә аалыҵ аизгеи.

АҞӘАФОН ахәыҷқәа ррыцҳара даҽак аҿгьы изымгылеит аганахь.

СПИД апрофилактикеи уи аҿагылареи ирызку Ареспубликатә Центр аҿы ашәҟәы иҭагалоу, ВИЧ-инфекциа зцәа иалоу  ахәыҷқәа ирзыҟаҵан аматериалтә цхыраара – ирыҭан 50 нызықь мааҭ аҧара.

Рашәара 26, анаркоманиеи закәандарала арҩышьыгақәа реикәыршареи Жәларбжьаратәи амш азы АҞӘАФОН афинанстә цхыраарала уи амш инақәыршәаны еиҿкаан аусмҩаҧгатәы. Ари апроект хацдыркит агәыцқьаратә ҧсҭазаара хықәкыс измоу агәыҳалалратә фонд “Аҿар бзиа рцентр”, ОО PRO-SPORT, Аҧсны апрофессионалтә бокс афедерациа, Аҧсны амотоспорт афедерациа.

Уи аҽны имҩаҧгаз авело-мотоныҟәара, аконцерттә программа, Аҧсны анарколог хада лықәгылара, ареспубликатә наркологиатә диспансер аҿы зҽызыхәшәтәуаз, зхы иаиааиз, ҧыхьа арҩышьагақәа здызкылоз иаарту рцәажәарақәа, хымҧада, анырра ҟарҵеит избаз зегьы рҿы, ҳтәылауаа азхьанарҧшит анаркоманиа апроблемақәа рышҟа, уи иахҟьаны иҟало ацәгьаурақәа рышҟа. Арҭ зегьы рлагала ҟарҵоит изызҳауа аҿар арҩышьыгақәа ирҿагыло адунеихәаҧшра рылааӡара аус аҿы.

АҞӘАФОН афинанстә цхыраара иабзоураны имҩаҧысит Очамчыра ақалақь аҿы Ауаажәларратә Еиҿкаара “Аҿар рҬыԥ “Гиуенос” аофициалла аартра.

Хәыда-ҧсада аҧсуеи англыз бызшәақәеи дырҵаразы акурсқәа, Аҧсны аџьынџьтәылатә еибашьраҿы Аиааира амш аламҭалазы аиҩызаратә шьапылампылтә матч, “Бреин-ринг” зыхьӡу аинтеллектуалтә хәмарра – ари АҞӘАФОН афинанстә ресурсқәа ззаунажьыз, даараӡак ихарҭәаам АҬыԥ аусмҩаҧгатәқәа рыхьӡынҵоуп.

2006 шықәсазы ихацыркын АҞӘАФОН-и Аҧсуа ҳәынҭқарратә университети русеицура. Уи аусеицура зыбзоурахаз ААУ ишьақәыргылаз «АКӘАФОН-GSM»  астипендиатә программа ауп. Уи аахыс иреиҕьу астудентцәа есышықәса хьыӡҳәалатәи астипендиа рыҭара АҞӘАФОН аҵара аганахьала асоциалтә политика иузаҟәымҭхо иадҳәалоуп.

АҞӘАФОН астипендиатә программа аҧҵоижьҭеи уи роухьеит 144-ҩык ААУ астудентцәа. Урҭ реиҳараҩык  иахьазы зпрофессионалтә разҟы маншәаланы ишьақәгылаз специалистцәоуп.

Сынтәа АҞӘАФОН анапхгара ирыӡбеит даҽа стипендиатә программак рыдыркыларц. Уи хацыркҩыс иамоу Ҳџьынџьуаа рҭоурыхтә ҧсадгьылахь рырхынҳәразы аҳәынҭқарратә комитет аиҳабы Хьрыҧс Џьапуа иоуп. Ари апрограмма хықәкыс иамоуп амҳаџьырқәа рхылҵшьҭра иеиуоу, Аҧснытәи ауниверситет аҿы аҵара зҵо астудентцәа-арепатриантцәа рыдгылара, урҭ раршьцылара,  ҳаамҭазтәи аҧсуаа руаажәларра иалахәны иҟаларц азы ацхыраара рыҭара ауп.  Астипендиа ихьӡ ахҵоуп кавказтәи аемиграциа аҧызацәа ируаӡәку, апоет, арккаҩы Омар Беигәаа. Есымзатәи астипендиа 2000 мааҭ ыҟоуп. О.Беигәаа ихьӡ зху ари хьыӡҳәалатәи астипендиа есышықәса 8-ҩык астудентцәа-арепатриантцәа ироулоит, факультетцыҧхьаӡа аӡәаӡәа. О.Беигәаа ихьӡ зху Хьыӡҳәалатәи астипендиа аиуразы ихадоу критериақәаны иҟоуп астудент аҵыхәтәантәи асеместр аҿы имоу академиатә қәҿиарақәеи, уи астуденттә ҧсҭазаара активла ихы алархәреи, аҧсуа бызшәа аҵараҿы иааирҧшуа ақәҿиарақәеи.

Аҵарашықәс ҿыц ианалагоз АҞӘАФОН инанагӡеит арепатриантцәа рҭаацәарақәа аматериалтә цхыраара рыҭара иазкыз даҽа акциакгьы. Ари асоциалтә проект ахацыркыҩцәас иҟалеит АҞӘАФОН аусзуҩцәа. Урҭ аӡәк иеиҧш еиқәышаҳаҭны ирыӡбеит АҞӘАФОН 11 шықәса ахыҵра иазкны акорпоративтә хәылҧазы амҩаҧгаразы иазҧхьагәаҭаз аҧара асоциалтә акциақәа ҩба рынагӡара иаздырхарц. Хәҭакы Украина ицо аибашьра иахҟьаны ҩныда инхаз ахәыҷқәа аматериалтә цхыраара рзыҟаҵаразы ишьҭын. Иаанхаз аҧарақәа 230 000 мааҭ зхәыҷқәа ашкол ахь ицоз арепатриантцәа 23  ҭаацәара ашколтә маҭәарқәеи амаҭәақәеи алаархәарц азы ирыҭан.

Аҟәатәи ажәабатәи ашьхарыуаа рышкол 150 шықәса ахыҵра иадҳәаланы АҞӘАФОН ашкол ҳамҭас ианаҭеит ашкол аҿы аныҳәатә хәылҧазқәа рымҩаҧгараан зыда ҧсыхәа ыҟам арадиомикрофонқәа ҧшьбеи, амикрофонтә қәыргыларҭақәеи, амиқшертә пульти рыла еибыҭоу акустикатә аппаратура, иара убас аноутбуки адәахьтәи аизакыгеи.

АҞӘАФОН 2014 шықәсазтәи асоциалтә усмҩаҧгатәқәа хзыркәшоз акциақәаны иҟалеит: 50 000 мааҭ аҧара ашколхәыҷқәа аҳамҭақәа рзаахәаразы Очамчыратәи араион администрациа рзышьҭра, Гәдоуҭатәи араион администрациа ашҟа – ашықәс ҿыц азы акинотеатр “Кьараз” аҿаҧхьа аныҳәатә ныҟәара аиҿкааразы, иара убас Аҟәа ақалақь администрациа ашҟа – аҳҭнықалақь ашықәс ҿыц азы ахаҿра архиаразы.

 

Аспорт

АҞӘАФОН асоциалтә хырхарҭа аганахьала аусураҿы Аҧсны аспорт аҿиара акрызҵазкуа аҭыҧ ааннакылоит. Сынтәа Ахеидкыла Аҟәатәи ашьапылампылтә клуб “Динамо” иҟанаҵаз ажәалагала иақәҿнаҭын, Ахрик Цәеиба ихьӡ зху ашьапылампыласразы 4-тәи Жәларбжьаратәи ахәыҷқәеи ақәыҧшцәеи ртурнир аофициалтә спонсорс иқәгылеит. Иара убасгьы, АҞӘАФОН ишьақәнаргылеит Аҟәатәи ашьапылампылтә клуб “Динамо” аҿы иреиҕьу ашьапылампыласҩы изы аҧхьахә.

Мшаҧымзазы АҞӘАФОН аспонсортә хадара иабзоураны имҩаҧысит “Уҧеиҧш унапы иакуп” зыхьӡу акубок агаразы Ареспублика Аҧсны ашкол-интернатқәа рыбжьара ашьапылампыласразы  Иаарту V алҧшааратә турнир. Ашьапылампыласра афестиваль «Petersburg Cup»  аиҿкааҩцәа ааҧхьара рырҭеит Калдахәаратәи ашкол-интернат аҵаҩцәа ркоманда аиҵбыратәи абжьаратәи агәыҧқәа. АҞӘАФОН аҿы ирыӡбеит арҧарацәа амҩахь рыцныҟәара мацара акәымкәа, 28-ҩык ашьапылампыласҩцәа хәыҷқәа афестиваль «Petersburg Cup»  ашҟа рцара аиҿкаара иадҳәалоу азҵаарақәа зегь рхахьы иргарц. Иара убасгьы аҩгәыҧк рҟынтәи 22-ҩык ашьапылампыласҩцәа хәыҷқәа рзы АҞӘАФОН иаанахәеит апрофессионалтә маҭәа.

Мшаҧымзазы имҩаҧысит уажәшьҭа итрадициахаз Жәларбжьаратәи ашахматтә турнир “АҞӘАФОН- OPEN». Аицлабра аҧхьахәтә фонд сынтәа 77000 мааҭ ыҟан.

Сынтәа цәыббра мзазы Аҟәа ақалақь аспорттә школ “Спартак” аҿы имҩаҧысит арҧарацәеи аҭыҧҳацәеи рыбжьара самбо азы ХI жәларбжьаратәи атурнир. Ари  аҧхьагылара мҩаҧган АҞӘАФОН ахадаратә спонсорра ала Ахьыҧшымра Амш аламҭалазы.

Абҵаразы Аҟәа имҩаҧысит “АҞӘАФОН АКУБОК” зыхьӡу ашьапылампыласразы III Жәларбжьаратәи ахәыҷқәеи ақәыҧшцәеи ртурнир. Уи атурнир аҧҵан 2012 шықәсазы  АҞӘАФОН абзоурала Аҧсны ашьапылампыласразы Афедерациа алархәны. Убри аахыижьҭеи уажәшьҭа хышықәсоуп ари атурнир сасцәаҵас иаднакылоижьҭеи Урыстәылеи Аҧсни ақалақьқәа рҟынтә ашьапылампыласҩцәа қәыҧшцәа.

 

 Акультура

Есышықәса рхыҧхьаӡара иазҳауеит АҞӘАФОН злахәу ҳтәыла акультура аҿиара иадҳәалоу апроектқәа. Аҵыхәтәантәи ашықәсқәа рахьтә зегь иреиҳау акакәны иҟоуп АҞӘАФОН инанагӡо амузыкатә проект “Ҳара ҳаруаа реиҳабы”. Абар уажәшьҭа ҩышықәса инеиҧынкыланы АҞӘАФОНи уи апроект авторцәа Емма Хәаџьааи Ҭемыр Қәычбериеи Аҧсны аџьынџьтәылатә еибашьраҿы Аиааира амшныҳәа аламҭалазы еиҿыркаауеит ари амузыкатә фильм амассатә хәаҧшра.  

Аиааира 21 шықәсхыҵра аныҳәа азгәаҭараан ахәаҧшцәа ирыздырхиеит зеиҧшыҟам апроект – “Ҳара ҳаруаа реиҳабы” иҿыцу, бжьы цқьа анагӡарала агастрольтә тур. «АМА RECORDZ» амузыкарҳәаҩцәа – Анри Гәымба, Алхаси Алмасхани Марколиаа, Ҭемыр Агрба, Ҭемыри Ревази Нарманиаа, иара убас апроект “Ҳара ҳаруаа реиҳабы” алахәцәа – Ерик Миқаа, Гьаргь Кәакәасқьыр, Валера Берзениа, Нарсоу Абыхәба ахәаҧшцәа ҳамҭас ирызнаргеит бжьы цқьала, ишиашоу инагӡоу, аинструменттә музыка зцу ашәақәа 18 рыла еибыҭоу аконцерттә программа.   Цәыббра 30 аламҭалазы  асимволтә ҵакы аанахәеит Гәдоуҭа араион иалиааз Денис Царгәыш Аҧсны иазааигаз даҽа иааиракгьы азгәаҭара. Хынтәны адунеи иачемпионхахьоу, Лондон имҩаҧысуаз Олимпиатәи ахәмаррақәа рҿы аџьазтә ҧхьахә згаз Денис Царгәыш иҷыдоу сасны даҭааит аконцерт “Ҳара ҳаруаа реиҳабы”. АҞӘАФОН Аҧсны адунеитә спорт ду ашҟа ицәырызгаз ҳџьынџьуаҩ ҭабуп ҳәа иаҳәо, ҳамҭас инаҭеит 200 нызықь мааҭ аҧара.  Агастрольтә тур хзыркәшоз акәны иҟалеит сынтәа ҧхынҷкәын мзазы амузыкарҳәаҩцәа Нальчик ақалақь аҿы рықәгылара.Уи алыршахеит АҞӘАФОН аспонсортә цхыраара иабзоураны.

Ҳаамҭазы еицырдыруа ашәҟәыҩҩы ду Фазиль Абдул-иҧа Искандер диижьҭеи 85 шықәса аҵра инадҳәаланы иаҧҵан афотоҭыхҩы, ажурналист Ибрагим Ҷкадуа  авторс дызмоу афильм. Уи аҧҵара алыршахеит АҞӘАФОН-и, ахеидкыла  “Аҧсны аӡқәеи аҩқәеи”, Аҧсны акультура министрра алархәны иҟарҵаз афинанстә цхыраара абзоурала. “Аҟазаара асиужет” – Фазиль Искандер илахьынҵеи  ибиографиеи ирызку фильмуп. Уи иагәылоуп архив аҟынтәи иааго, иара убасгьы  ҳаамҭазтәи аклассик иҿцәажәарақәа, Фазиль Абдул-иҧа ихаҭеи ирҿиареи акыршықәса ибзианы издыруа  еицырдыруа ауаа ражәабжьқәа.

 Сынтәа цәыббра мзазы АҞӘАФОН спонсор хадас иаманы Аҧсуа телехәаҧшраҿы ихацыркын Светлана Корсаиа авторс дызмоу ателехәаҧшратә проект  “Атеатри аамҭеи”. Уи хықәкы хадас иамоуп амилаҭтә театри аҧсуа хәаҧшцәеи ртрадициатә еимадарақәа реиҭарҿиара, С.Ҷанба ихьӡ зху Аҧсуа драматә театр аҭоурых адаҟьақәа ахәаҧшцәа рызнагара,  аҧсуа театртә ҟазареи аҧсуа ҳәынҭқарратә бызшәеи раларҵәара, аҧсуа уаажәларреи ҳаамҭазтәи амилаҭтә театри реимадара арыҕәҕәараҿы ацхыраара аҟаҵара, иреиҕьу атеатртә традициақәа реиҭарҿиара.

АҞӘАФОН ацхыраарала иалыршан Аҧсни Урыстәылеи асахьаҭыхратә Еидгылақәа рлахәыла, асахьаҭыхҩы Баҭал Џьапуа ипроект –  адокументалтә фильм “Мрагыларатәи афронт” аҭыхра. 1992-1993 шш.рзы Аҧсны аџьынџьтәылатә еибашьраан Мрагыларатәи афронт аҿы имҩаҧысуаз аибашьратә еидысларақәа аазырҧшуа ари афильм ах-сериакгьы профессионалтә бжьыла аиқәыршәаразы афинанстә цхыраара ҟанаҵеит АҞӘАФОН. Аусурақәа зегьы ирылҵшәаны аекран ашҟа ицәыргоуп Аҧсны атәылахьчаратә министрреи Аҧсуа ҳәынҭқарратә архиви рдокументқәа шьаҭас измоу х-сааҭктәи адокументалтә фильм.

Ашықәс ҿыц аламҭалазтәи агала-концерт ала ихыркәшан шықәсык аҧсуа естрадатә музыка аларҵәара аус азызуаз, аҧсуа авторцәеи анагӡаҩцәеи рыцхыраара хықәкыс измаз, урҭ рықәҿиарақәеи реихьӡарақәеи аазырҧшуа амузыкатә проект “Сара сашәа”. Ари ашықәс зегьы апроект спонсор хадас иҟан АҞӘАФОН.

Традициала ишаҧу еиҧш, ииасуа ашықәс АҞӘАФОН ихнаркәшоит уи абонентцәа ирызнархиаз ашықәсҿыцазтәи акциала!

Ҧхынҷкәын 24 инаркны жьырныҳәа 19 аҟынӡа 4G-ахәхшәааратә планқәа рахьтә иарбанзаалак акы аҿазкыз далахәхар алшоит асупер-ҧхьахәқәа ҧшьба: iPhone 6 асмартфонқәа ҩбеи, iPhone 6+ асмартфони, иара убас 4G нызкыло Huawei апланшети! Иара убасгьы ҧхынҷкәын 31 аҟынӡа АҞӘАФОН Амаҵзуратә Ҭыԥқәа руак аҿы иаҿазкыз абонентцәа зегьы раҧхьаӡатәи амобилтә еимадара аҟынтәи аҳамҭақәа рзыҧшуп.

Ашықәс Ҿыц – аҩны ахҭыс лашақәа ҩназгало ҳазнысыз ашықәс иацыз ауадаҩрақәа зегьы ҳхызго ҭаацәаратә ныҳәоуп. Иарбан ҭаацәаразаалак ари аныҳәа ирнаҭоит гәыҕра ҷыдак.

АҞӘАФОН абонентцәеи, ҳтәыла иқәынхо ауааҧсыра зегьы иааиуа Ашықәс ҿыц  рыдныҳәало, ирзеиҕьанашьоит ҭаацәацыҧхьаӡа  аманшәалареи, аҭынчреи!  Ишәыгымзааит еснагь ишәзааигәоу, ишәызгәакьоу, бзиа ижәбо ауаа!  Ишәмырӡын ахааназ  ишәызгәакьоу ауааи шәареи шәеимадара!

Ҽааныбзиала! Аимадара шәмырӡын!