Аҧсуа романс ахәылҧаз “Сара гәыла ишәасҳәоит”.

Нанҳәа 22 рзы  Р.Џь.Гәымба ихьӡ зху Аҧсуа ҳәынҭқарратә филармониа асценаҿы АҞӘАФОН ахадаратә спонсоррала, имҩаҧысит аҧсуа шәаҳәаҩы Мадина Кәарацхьелиаҧҳа раҧхьатәи лсолатә концерт. Ашәаҳәаҩы илыцықәгылеит Давид Терзиан напхгара зиҭо Аҧснытәи аҳәынҭқарратә камертә оркестр.

 Аконцерт “Сара гәыла ишәасҳәоит” Гнесинаа рыхьӡ зху Урыстәылатәи амузыкатә академиа аушьҭымҭа Мадина Арӡынҧҳа  лзы -  лгәаҳәара аҧсҭазаара иалазырҵәаз проектны иҟалеит, уи иаанартит ашәаҳәаҩ лырҿиаратә лшара аҷыдарақәа, ахәаҧшцәа ирызцәырнагеит аҧсуа романс иуникалтәу антологиа.

 Афилармониа асцена аҟнытә раҧхьаӡа акәны иҩныҩит аоркестровка зызуз еицырдыруа аҧсуа композиторцәа рромансқәа жәохә: Руслан Агәмаа, Константин Ченгьелиа, Оҭар Хәынцариа рырҿиамҭақәа, иара убас лара Мадина Кәарацхьелиаҧҳа лҩымҭақәа.

Иманшәалоу аҭагылазаашьа, зхаҭабзиара ҳараку анагӡара, ухәы-ужьы еилазыргыло, зымҽхак дуу абжьы цқьа,  аинтерес зҵоу апрограмма ахәаҧшцәа агәаҳәара рнаҭон авокалтә музыка азыӡырҩра.  Ахәаҧшцәа иҧханы ирыдыркылеит ашәаҳәаҩ лықәгылара, азал аҟнытә лассы-лассы игон: “Браво!” ҳәа абжьқәа.

   Ароманс – қәыҧсычҳарак иаҩызоу ашәоуп, ауаҩы игәы иҭоу зегьы цәырго, ихьуа аартны изҳәо, дзыргәамҵуа, дызмырцәо атәы ҳзырдыруа -  аартрак иаҩызоу ашәа. Аамҭа цацыҧхьаӡа зҽызыҧсахуа амузыкатә жанрқәеи астильқәеи мацара ракәӡам, аҽаҧсахуеит аҧсҭазаара аритмгьы, рҽырыҧсахуеит амузыкеи апоезиеи рнырра, ацәанырра аҩаӡара. Аха ауаҩы дышуаҩу даанхоит; џьаргьы ицаӡом уи игәаҳәарақәа, игәы хыҭ-хыҭра, иемоциақәа зегьы аанхоит, урҭ хымҧада ирыҧшаауеит ацәыргаразы ахархәага ҿыцқәа.

 Ароманс иахьагьы, ХХI- тәи ашәышықәсазгьы иалшоит инагӡаны ауаҩы иемоциатә ҧсҭазаара аарҧшра.

 «АҞӘАФОН-GSM» адәныҟатәи аимадарақәа рыҟәша.