Аҧсны Аҳәынҭқарра Ахада икубок агаразы аҽырыҩра

Аҧсны  Аҳәынҭқарра Ахада икубок агаразы аҽырыҩра

Нанҳәа 27 2016 шықәсазы Бзыҧ ақыҭан иҟоу аипподром аҿы  имҩаҧган “Аҧсны Ахада икубок” агаразы Аҩбатәи Жәларбжьаратәи аҽырыҩра. Арҭ аицлабрақәа еиҿыркааит  Аҧсны абаҩрҵәыратә культуреи аспорти рзы Аҳәынҭқарратә Комитети Аҧсны аҽырыҩратә спорт Афедерациеи.

Ари аусмҩаҧгатәы аҧхьахәтә спонсорс иқәгылеит Аилахәыра АҞӘАФОН. Сынтәа уи аҧхьахәтә фонд 200 000 нызықь мааҭ ыҟан.

Раҧхьаӡа акәны Аҧсны Ахада ихьӡ зху акубок агаразы аҽырыҩра еиҿкаан ҵыҧх. Усҟан аиааира игеит Аҧснытәи  аҽыбҕаҟаза ҷкәын Анзор Саманџьиа. Сынтәагьы Аҧсны Аҳәынҭқарра Актәи Ахада ихьӡ зху акубок дырҩегьых ианашьахеит аҧсуа ҽыбҕаҟаза Анзор Саманџьиа.

Аицлабра рхы аладырхәит Аҧсни, Нхыҵ Кавкази, Краснодартәи атәылаҿацәи, Ростовтәи аобласти рҟнытә 40-ҩык инареиҳаны аҽыбҕаҟазацәа.

Аицлабрақәа раартраҿы иҟан: Аҧсны Аҳәынҭқарра Ахада Рауль Ҳаџьымба, аҧыза-министр Беслан Барцыц, Аҧсны иҟоу Урыстәыла афедерациа ацҳаражәҳәаҩ Семион Григориев, аҩныҵҟатәи аусқәа рминистр Аслан Кобахьиа, ҳтәыла аҵареи, аҭҵаарадырреи, абаҩрҵәыратә культуреи аминистррақәа реиҳабацәеи русзуҩцәеи. 

 «АКӘАФОН-GSM» адәныҟатәи аимадарақәа рыҟәша