Ахрик Цәеиба ихьӡ зху Акубок агаразы ашьапылампыл асцәа хәыҷқәеи ақәыԥшцәеи lV Жәларбжьаратәи реиндаҭлара Аркра

Ахрик Цәеиба ихьӡ  зху  Акубок  агаразы  ашьапылампыл асцәа хәыҷқәеи  ақәыԥшцәеи lV Жәларбжьаратәи реиндаҭлара Аркра

Лаҵарамза 23 рзы деилкаахеит Аилахәыра АҞӘАФОН аԥаратә цхыраарала  имҩаԥысуаз Ахрик Цәеиба ихьӡ зху акубок агаразы ашьапылампыл асраҿы аиааира згаз. Фымш имҩаԥысуаз аицлабраҿы ачемпион ҳәа ахьӡ ргеит Сҭампыл ақалақь аҟынтә  ахәмарра иалахәыз АК «Бешикташ» акоманда.

Аицлабра  анадыркуаз аҽны имҩаԥган х-матчк, урҭ рылҵшәақәа рыла далкаан   Ахрик Цәеиба Икубок иаԥсахазгьы.

«Спартак» Нальчик             0:3    «Спартак» Цхинвал

«Бешикташ» Сҭампыл        4:0    «Анжи» Махачкала

«Аԥсны еизаку акоманда»  1:1    «Терек» Грозныи

Атурнир аркразы еиҿкааз  ацеремониа аҟны аҳамҭақәа рыҭан дасу рыхәмаррақәа рҿы зегьы реиҳа аҟазара аазырԥшыз.

Иреиӷьу амбахьчаҩ  –  Сармат Цховребов («Спартак» Цхинвал)

Иреиӷьу ахьчаҩ         –  Смел Ҳагба (Аԥсны еизаку акоманда)

Иреиӷьу абжахьчаҩ  –  Раџьи Магомедов («Анжи» Махачкала)

Иреиӷьу ажәылаҩ     –  Муса Ераҭ («Бешикташ» Сҭампыл)

Иреиӷьу ампыл ҭаршәҩы – Апихан Гәыбжоков («Спартак» Нальчик)

Аицлабраҿы зегьы реиҳа иалкаахаз  ахәмарҩы – Иазинџьы Ергәыгруп («Бешикташ» Сҭампыл).

Аиндаҭлара ачемпион аҭырқәцәа ркоманда «Бешикташ» аспорт жәларбжьаратә акласс азҟаза Ахрик Цәеиба хаҭала ириҭеит  аицлабра аҳамҭа хада – Аиааира  Акубок.

Аилахәыра  АҞӘАФОН иаԥнаҵеит Аԥсны Еизаку агәыԥ аҟны  ахәмарцәа иреиӷьхо изы аҳамҭа. Уи акомандаҿы  ахьчаҩ  иҭыԥ аанызкыло  Смел Ҳагба иакәхеит. Аилахәыра АҞӘАФОН адәныҟатәи аимадарақәа рыҟәша аиҳабы Гета Арӡынба уи ахәмарҩы ԥхьаҟа аспорт аҿы иҵегьы аихьӡарақәа изеиӷьашьо ҳамҭас илҭеит  аинтернет-планшет  афирма Apple iPad иатәу.

АК «Бешикташ» афан-клуб арҭ аицлабра амшқәа зегьы рыҩныҵҟа акоманда акырӡа иахаҵгылаз, бзиа ирбо аклуб азы ирхианы ирымаз аҳамҭа ахәмарра аркра иазкыз ацеремониаҿы ирырҭеит.

Иара убас, аҳамҭақәа рыҭара иазкыз  ацеремониа далахәын Аԥсны Аҳәынҭқарра аспорти аҿари русқәа рзы Аҳәынҭқарратә еилакы Ахантәаҩы Шьазина Аҩӡба.

Аицлабра  абзиабаҩцәеи алахәыҩцәеи даҽа зныкгьы иазгәарҭеит аицлабра акырӡа еиҿкааны ишымҩаԥгаз. Иааиуа ашықәс азы зегьы реиҳа адунеи иалаҵәаны иҟоу ари аспорт хкы абзиабаҩцәа  даҽа зныкгьы ҳаиднакылоит зеиӷьа ыҟам ари аныҳәа.

ИАЕ «АҞӘАФОН-GSM» адәныҟатәи аимадарақәа рыҟәша